Wer sich janz unschineet et Jeseech met Kruck beschmeet
un sich met Fleeje an de Wäng zerschleit,
wer Schohn met Kalvfleisch lapp, mem Mungk noh Möcke schnapp,
wer en de Rieszupp Mostert schödden deiht,
wer leddere Lappe käut, un sich mem Kopp zerhäut,
wer et jroße Loß jewennt un nimmb nit an,
wer noch met dressig Johr am Duhme lötsch,
dä es verdötsch! Dä es verdötsch!
Wer sich ne Strühhot käuf, dann domet Schlittschon läuf,
un dann ne Sonnestich em Winter kritt,
wer Naaks jeriet en Woht, un läht sich en de Soht,
wer für ne Jrosche fuffzehn Penning jitt,
wer sich met Knolle wisch, un dann am Mond avdrüch,
wer sich mem Bessem singe Kopp frisiert,
wer üvver unjehubbelte Bredder rötsch,
dä es verdötsch! Dä es verdötsch!
Wer sich de janze Woch des Meddags Brutzupp koch,
un wer et Schlofejonn des Naaks verjiss,
wer nur Petroleum drink, et Bier mem Jlas verschlingk,
wer met der Jaffel immer Fleischzupp iss
wer sich e Zweirad käuf un stellt et op de Läuf,
wer sich vun Botzeknöpp schött Kaffee op,
un wer en Jaslatän en de Backe petsch,
dä es verdötsch! Dä es verdötsch!
